ദേവീസ്തുതി ദളങ്ങൾ - 60 ( ശ്രീ ലളിതാത്രിശതി)

  ദേവീസ്തുതി ദളങ്ങൾ - 60                      

ശങ്കര ഭാഷ്യത്തെ കണ്ടിയൂർ മഹാദേവ ശാസ്ത്രിയുടെ ഭാഷാ ഭാഷ്യമായ ശ്രീ ലളിതാത്രിശതി മുൻനിർത്തി എന്റെ പരിമിതിയിൽ നിന്നും എഴുതാൻ ഉള്ള ശ്രമം ആണ് , തെറ്റ് കുറ്റങ്ങൾ  സദയം പൊറുക്കുക , അമ്മേ ശരണം ദേവി ശരണം , എന്റെ കുടുംബ ദേവതയായ പലിപ്ര കാവിൽ വാഴും ശ്രീ ഭദ്രക്കു മുന്നിൽ സമർപ്പിക്കുന്നു .

ശ്രുതി ദളം - 60  

ഹ്രീംകാരമാകുന്ന നന്ദനാരാമത്തിന് 

ദേവേന്ദ്രോ ദ്യാനത്തിന് നവയായ് 

അതികോമളയായ് ഇരിക്കുന്ന കല്പകവല്ലരിയായ് 

കല്പകപ്പൂങ്കുലയായ് ഇരിക്കുന്നവളേ സർവാർത്ഥ സാധികേ നമിക്കുന്നേൻ 

ഓം ഹ്രീംകാര നന്ദനാരാമ നവകല്പക വല്ലര്യൈ നമഃ 296 .

ഹിമവാനിൽ നിന്നും പാവനിയായ് 

സർവ്വ പുരുഷാർത്ഥ പ്രദയായ് ഇരിക്കുന്ന 

ഗംഗാ ഉത്ഭവിക്കുന്നത് പോലെ 

ഹ്രീംകാരത്തിൽ നിന്നും മന്ത്രദേവതാരൂപിണിയെ കൈ തൊഴുന്നേൻ 

 ഓം ഹ്രീംകാര ഹിമവല്‍ഗ്ഗംഗായൈ നമഃ 297 .

ഹ്രീംകാരമാകുന്ന പാലാഴിക്ക്  കൗസ്തഭമായ് 

പതിനാലു രത്നങ്ങളിൽ ശ്രേഷ്ഠമായും 

അധിക പ്രകാശ മുള്ളതായ്  ഇരിക്കുന്ന പോലെ 

ഹ്രീംകാരമന്ത്രത്തിൽ നിന്നുത്ഭവിച്ച പ്രകാശരൂപിണി ദേവിയമ്മേ 

ഓം ഹ്രീംകാരാര്‍ണ്ണവ കൗസ്തുഭായൈ നമഃ 298 . 

ശ്രീവിദ്യാ മന്ത്രത്തേയോ 

ഹ്രീംകാരമന്ത്രത്തേയോ ഉപാസിക്കുന്നവർക്കു 

സർവ സമ്പത്തായ് സർവാർത്ഥ സാധക ശക്തിയായ് 

ചൈതന്യ രൂപിണിയായവളേ നമിക്കുന്നേൻ  

ഓം ഹ്രീംകാരമന്ത്ര സര്‍വ്വസ്വായൈ നമഃ 299 .

ഹ്രീംകാരത്തോടു കൂടി ശ്രീവിദ്യാജപ പരന്മാർക്കു 

ചതുർവ്വിധ പുരുഷാർത്ഥ പ്രാപ്‌തി കൊണ്ടു 

ആനന്ദത്തെ ദാനം ചെയ്യുന്നവളേ ശ്രീദേവി 

ത്രിമൂർത്തികളാൽ സംപൂജിതേ സകലേ നമിക്കുന്നേൻ 

ഓം ഹ്രീംകാരപര സൗഖ്യദായൈ നമഃ 300 . 

''സർവ മംഗള മംഗല്യേ ശിവേ 

സർവ്വാർത്ഥ സാധികേ 

ശരണ്യേ ത്രയംബികേ 

ഗൗരി നാരായണി നമോസ്തുതേ"  

അവിടുത്തെ കീർത്തനങ്ങളേ 

ക്ഷതമില്ലാതെ അക്ഷര രൂപമായ്

അർപ്പിക്കുവാൻ നിത്യം ശേഷിയും

ശേമുഷിയും നൽകി 

അനുഗഹിക്കേണമേ ഭഗവതിയമ്മേ 

തവ പാദങ്ങളിൽ അർപ്പിക്കുന്നേൻയീ 

മന്ത്ര പൂജകൾ സ്വീകരിച്ചാലും അമ്മേ 

ഇതി ശ്രീ ലളിതാത്രിശതി മന്ത്ര പൂജനം സമ്പൂർണ്ണം 

ജീ ആർ കവിയൂർ 

26   .04  .2021

300 / 5  = 60 ശ്രുതി ദളം - 60  / 60