Thursday, August 29, 2013

കുട്ടി കവിതകൾ

കുട്ടി കവിതകൾ 

മഴ 

ചറപറ ചടപട മേളം
ചോരാതെയിരുന്നൊരു കൂര
തവളക്കുഞ്ഞിനായി വിരിഞ്ഞൊരു കട
കാണാന്‍ എന്ത് ചന്തം
കൂണിന്‍കുട കണ്ടു
അയലത്തെ കുഞ്ഞി ചേച്ചിക്കും
ഉണ്ണിക്കുമാകെ സന്തോഷം
ചറ പറ പെയ്തു മഴ ........

സ്നേഹം 

കാക്കക്കും
പൂവാലിപയ്യിനു  തന്‍
കുഞ്ഞിനോടെന്ന പോലെ
അച്ഛനുമമ്മക്കും
അനുജത്തിക്കും
എന്നോടു ഏറെ സ്നേഹം  

കൃഷി

നാല്‍ക്കാലിയാല്‍ ഉഴുതുമറിച്ചു
വാരിവിതറി വിത്ത്‌ മുളച്ച വയലില്‍
വെള്ളംകൊടുത്തു  വളം നല്‍കി
കൊയ്യ്തു മെതിച്ചു
നെല്ലോക്കെ കുത്തിയെടുത്തയരിയാല്‍
നാണിയമ്മ ഉണ്ടാക്കിയ കഞ്ഞി
കുഞ്ഞി കുടിച്ചു ആര്‍ത്തിയോടെ
കൃഷിയെന്തെന്നുഅറിയാതെ

സ്വാതന്ത്ര്യം 

കാട്ടിൽ നിന്നും കൊണ്ട് വന്നൊരു
തത്തയെ കൂട്ടിലിട്ടു വളർത്തി ചേട്ടൻ
ചേട്ടനെ  പൂട്ടിയിട്ടമ്മ ഒരുനാൾ
തുറന്നു വിട്ടു ഞാനൊന്ന് അമ്മകാണാതെ
സ്വാതന്ത്ര്യമെന്തന്നു അറിഞ്ഞൊരു നേരം
കൂട്ടിലിട്ടു വളര്‍ത്തിയ തത്തയെ
മാനം കാട്ടി പറത്തി വിട്ടു ചേട്ടൻ
---------------------------------------------------------------------------------------------------------

മുകളില്‍ ഉള്ള കവിതകള്‍ പ്രൈമറി ക്ലാസ്സില്‍ പഠിപ്പിക്കാന്‍ വേണം എന്ന് പറഞ്ഞ പ്രകാരം സുഹൃത്തായ ടീച്ചര്‍ക്ക്‌ വേണ്ടി എഴുതിയത് 

Wednesday, August 28, 2013

അകലെയുള്ളതിനായി

അകലയോ ഹൃദയമായി
അറിയുമോ എന്‍ ഉള്ളമേ
അഴലുകള്‍ അഴിയുന്നു
ആരോടായി  പറയുമി
അണയാത്തൊരു മധുരമേറും
അലിയാത്തൊരു നൊമ്പരം  
അഗ്നിയായി പടരുമോ
ആത്മാവിന്‍ സ്വാന്തനം
അരികില്‍വന്നിടുമോ ആഴ കടലിന്‍
ആര്‍ത്തിയെറും തിരകളുടെ ആഗ്രഹം
ആരോമലേ അലിയുകയെന്നിലായി
ആകാശമേറെ മറക്കും കറുത്ത മേഘമേ
അലിവായി പെയ്തുയോഴിയുമോ
അകലത്തുള്ള ഹൃദയത്തിനായി

Monday, August 26, 2013

അറിയാതെ

അറിയാതെ



രേതസ്സുകള്‍ കാറ്റിലുടെ പറന്നു
അരികിലെത്തിയ
യോനി മുഖങ്ങളില്‍
പരിഹാസപുഞ്ചിരി
ബീജവാഹിനിയില്‍ ത്രസിക്കുന്ന
കണ്‍കണങ്ങളില്‍ നിഴലിക്കുന്ന
ശാക്തികരണത്തിന്റെ ഉര്‍ജ്ജ
സ്ഫുലിംഗങ്ങള്‍ അറിയാതെ
ഷണ്‌ഡന്മാരുടെ പീഡങ്ങളുടെ
നഗ്നനൃത്തങ്ങള്‍ ജന്മ രഹസ്യമറിയാതെ

Sunday, August 25, 2013

ധന്യമായെനേം

ധന്യമായെനേം

നീ എന്ന സ്മൃതി എന്നെ വേട്ടയാടുന്നു
കിനാവള്ളിപോലെ ചുറ്റി വരിയുന്നു
മനസ്സിന്റെ കണ്ണാടിയില്‍ ഒരു ഛായാബിബമായ്
രണ്ടു തുള്ളികളാല്‍ ചാലിച്ച ലവണ രസം
നിനക്കായോ അതോ മറ്റാര്‍ക്കായോ
നൊമ്പരം കൊള്ളുന്നവര്‍ക്കൊരു
സന്തോഷത്തിന്‍ മഴവല്ലിന്‍ വര്‍ണ്ണം പകര്‍ന്നു
അത്താണിയായി മാറുവാന്‍ കഴിയുകില്‍
ജീവിതമെത്ര ധന്യമാകുമായിരുന്നുന്നെനേം 

Sunday, August 18, 2013

സഞ്ചാര പഥങ്ങളില്‍

സഞ്ചാര പഥങ്ങളില്‍

രാത്രിക്കേറെ ആഴമുള്ളതുപോലെങ്കിലും  
ഒളിച്ചില്ല  മനസ്സിന്റെ പിന്നാമ്പുറങ്ങളിൽ
ഹൃദയവേദന നിറഞ്ഞുനില്‍ക്കവേ
എൻ  കണ്ണുകൾ നീരണിഞ്ഞില്ല.

ആരുമില്ലെനിക്കുയിന്നു എന്നെ  കുറിച്ചോന്നാരായാൻ
ഉണർന്നിരിക്കുന്നു ആർക്കൊക്കെയോ വേണ്ടി  
അറിയാതെയിങ്ങിനെ
എന്തിനാണെന്നതുമാരുമറിഞ്ഞില്ല,

ഹൃദയത്തിൻ നോവേറുമിടിപ്പുകൾ.
ലോകം ഒന്നുമറിയാതെ കെട്ടിവേച്ചീ
ദു:ഖങ്ങളൊക്കെയും  എല്ലാം സഹിച്ചു മൗനമായി
എന്തിനെന്നയറിയാതെ.

ഒടുവിൽ കഠിന ഹൃദയനായി മുദ്രകുത്തപ്പെട്ടു
എന്തിനെന്നറിയാതെ വീണ്ടുമീ യാത്ര
തുടരുന്നു ഞാനും എങ്ങോട്ടെന്നറിയാതെ
സഞ്ചാര പഥങ്ങളിലുടെ അനന്തതയിലേക്ക്

കുറും കവിതകൾ 115

കുറും കവിതകൾ  115


കാറ്റിനാലും മിന്നലിനാലും
ഇടിയാലും  മഴയാലും
അവളിലെക്കുള്ള ദൂരം കൂട്ടിയില്ല

തുമ്പപ്പു ചിരിയുമായി
തുമ്പി തുള്ളി
അവളെത്തി  ഓണനിലവായി

വളയും കൊലുസ്സും
കിലുങ്ങിയിട്ടുമവളുടെ
ചിരിയോളമെത്തിയില്ലയൊന്നും

പൂവിനു പൂമ്പൊടിയും
മാരിവില്ലിന്‍ നിറവുമായി
അവളെത്തി ചിങ്ങം

ഉപരോധം
ഉപദ്രവമായി ജനം
ഉഴലുന്നു അണികള്‍

രവണമേറെ
രവണകത്തിലൊളിച്ചിരിക്കും
രാവണനല്ലോയി മനം


Saturday, August 17, 2013

ചിങ്ങമേ നീ വരവായോ

ചിങ്ങമേ നീ വരവായോ


വന്നുവോ നീയും ചിങ്ങനിലാവേ തുമ്പപ്പു ചിരിയുമായി
കര്‍ക്കടകത്തിന്‍ കാളിമ പകരും നോവേല്ലാമകറ്റി
നെഞ്ചോടു ചേര്‍ത്തോരെന്‍ ഓര്‍മ്മകള്‍ തികട്ടിയി-
ങ്ങുവന്നു പഴയോരോണത്തിന്‍ സദ്യയുടെ സമൃദ്ധി
നിറഞ്ഞ മണവും മനവുമായി നാടുവിട്ടൊരു നാളുകളി-
ന്നുമോടി അടുക്കാന്‍ കൊതിയൊടെ വന്നിടാമിനി
സന്തോഷത്താല്‍ മലനാടെ എങ്കിലും തിരികെയെന്നിനി
മറുനാട്ടിലേക്കെന്നു കേള്‍വി കേള്‍ക്കുന്നവരുണ്ടെങ്കിലും
പ്രവാസിയാക്കി മുദ്ര കുത്തിയകറ്റിയില്ലേ എല്ലാവരാലും
മറക്കുന്നു പൊറുക്കുന്നു കേരവൃക്ഷ തലപ്പുകള്‍ കൈയാട്ടി
വിളിക്കുമ്പോള്‍ എങ്ങിനെ വരാതിരിക്കാനാകും നിന്‍ അരികെ




Thursday, August 15, 2013

നിന്നില്‍ ഒരുടിം


നിന്നില്‍ ഒരുടിം

നിൻ  സ്മൃതിവലയങ്ങളിൽ
നൽകിയില്ലേയെനിക്കായിയോരിടം  
നിൻ  ചില്ലകളിൽ  ചേക്കേറാൻ
തന്നില്ലേ അസുലഭമി  നിമിഷങ്ങൾ
നിൻ  നിമ്നോന്നതങ്ങളുടെ
നീലിമയിൽ  അലിയാൻ
എനിക്കുയെറെ തിടുക്കം
എത്രയോ രാവുകൾ പകലുകൾ
കടന്നകന്നുവല്ലോ എന്തേ നിന്നെ
മാത്രം ഇന്നുവരെ കണ്ടു മുട്ടിയില്ല
പ്രകൃതി ഓരോ  ചലനവും
മുന്നേകൂട്ടി തീരുമാനിക്കുന്നു
അതാവും അതിനുള്ള സമയം
ആകാഞ്ഞത്   അല്ലേ

Tuesday, August 13, 2013

മുന്നോട്ടു മുന്നോട്ട്

മുന്നോട്ടു മുന്നോട്ട് 

കാത്തിരിക്കുന്നു ഒരു 
ശനി ഒഴിഞ്ഞ 
ഞായറിങ്ങു വന്നെങ്കില്‍ 
രണ്ടിനേം കോർത്തൊരു 
സണ്‍‌ഡേയുമായിതാ 
ഒന്നുമറിയാതെ നിദ്രയിലാണ്ടു 
പിന്നെ ചിന്തയിലായി വരുന്നല്ലോ 
ഇനി ഒരു ദിനം അടുത്തായി 
സ്വാതന്ത്ര്യം ആഘോഷിക്കാന്‍
ഒരു വെള്ളിയും ശനിയും കിട്ടുകില്‍
സണ്‍‌ഡേ ഫ്രീ ആയിക്കിട്ടും
അവധി തരപ്പെടുകില്ല
ഇനി തരപെട്ടാലും ടിക്കറ്റ്‌ കിട്ടില്ല
ഇനിയിപ്പോ എന്താ ചെയ്യുക
വീണ്ടും സണ്ടെറ്റു മണ്ടേ
മണ്ടയിലെറ്റുകഭാരമെല്ലാം
അങ്ങിനെ ജീവിതം രണ്ടറ്റം
കാണാതെ മുന്നോട്ടു മുന്നോട്ടു

Sunday, August 11, 2013

കുറും കവിതകള്‍ 114


കുറും കവിതകള്‍ 114

വര്‍ണ്ണങ്ങളുടെ ആകാശം തേടി
കാത്തിരിപ്പിന്‍ ആഴങ്ങളില്‍ നിന്നും
മൌനം വെടിഞ്ഞൊരു ശലഭം

കടലിന്‍ ഇരമ്പല്‍
കായലിന്‍ ശാന്തത
കരളില്‍ നൊമ്പരമധുരം

തിരയടങ്ങിയ കടലിന്‍
മൌനം ആസ്വദിക്കുന്ന
തീരത്തിന്‍ സംതൃപ്തിയറിഞ്ഞു

കാറ്റിന്‍ കൈയ്യാല്‍
മുളം തണ്ടിന്‍
സംഗീത കച്ചേരി

വഴിതെറ്റിയ
തെറ്റിപൂ വിരിഞ്ഞു  
മുറ്റത്തും മനസ്സിലും

അദൃശ്യമായി വന്നു
കുളിരേകിയകലും കാറ്റേ
നീയറിയുമോയവളുടെ മനസ്സു

പ്രണയ പരിഭവ തീരത്ത്‌
തീര്‍ത്ത മാനസ്സ കൊട്ടാരം
നിന്‍ നോട്ടത്തില്‍ ഉടഞ്ഞു തകര്‍ന്നു 

Friday, August 9, 2013

വിജയം സുനിശ്ചിതം

വിജയം സുനിശ്ചിതം

വിശ്വപ്രാണശക്തിക്കു അധീശനായ്
വ്യാപകമാം ചിന്തകളുടെ അധിനിവേശത്തില്‍
ചുവടു പിടിച്ചു അസംതൃപ്തിയുടെ
ചടുലതാളലയത്തിലായി
ഈശനുമീശോയുടെയും പ്രലോഭനം
ഈശല്‍ ഗോപുരത്തോളമേറുന്നു
പ്രകീര്‍ത്തിക്കുവാന്‍ ഒരുങ്ങുന്ന കാഴ്ച
പ്രാണനിന്‍ പ്രതിഛായാല്‍ മറ സൃഷ്ടിച്ചു
ഏറെ മുന്നേറുന്നു വീണ്ടും വീണ്ടും
പുനര്‍ജനിയായ് ലക്ഷ്യമില്ലാതെ
അലയുന്നുയിന്നു ഈ ലോകമെങ്ങോട്ടെക്ക്
അറിയുക ഉണരുക മുന്നേറുക
മനം ചെയ്യുക മനുഷ്യനാകുക
നേടാം മോക്ഷസായകമാം
പരാശക്തി തന്‍ പാദങ്ങളിലണയാം
വിജയം സുനിശ്ചിതം

Thursday, August 8, 2013

ഓണമാണെന്നും

 ഓണമാണെന്നും

ഓലം കൂട്ടും ഓളം തല്ലുന്നുമെൻ
ഓര്‍മ്മകളെ ഒന്നു ഓമനിക്കാന്‍
ഒരുങ്ങുന്നു മനസ്സിലായങ്ങു
ഒരുമയുടെ പേരുമയാല്‍ ഒത്തുചേരും

തുമ്പിതുള്ളലും തുമ്പപ്പൂ ഒരുക്കലും
തൂശനിലയില്‍ വിളമ്പിയുണ്ടും
തുള്ളി കളിച്ചു ഊയലാടുമാ
തുഷാര ബിന്ദുക്കളുടയും പോലെ

ഓടിയകന്നുവല്ലോ കിനാക്കളെല്ലാം
ഒരായിരമാഘോഷങ്ങളൊത്തു ചേരുമാ
ഓണത്തിന്‍ നിറം പകര്‍ന്നയകന്നാരെന്‍
ഓമല്‍ ബാല്യകൗമാരങ്ങളൊക്കെ

ഇന്നുണ്ടോ അറിവു അന്നിന്‍
ഇഴയടുപ്പിക്കും ഈണം പകരുമാ
ഈരടി പാടുമാ പാട്ടുകളൊക്കെ
ഇല്ല ചതിയുമില്ല പൊളിവചനങ്ങളും

ഒട്ടല്ല കൗതുകമേറുന്നു നാട്ടിലായി
ഓശാന പാടിയും ഒറ്റക്കും പെട്ടക്കും
ഒറ്റുകൊടുക്കുന്നു കര്‍ക്കിടത്തിനൊപ്പം
ഒരല്‍പ്പമില്ല നാണവും മാനവും

പണമാണ് നിണത്തെക്കാള്‍
പെരുത്തതെന്നു പറഞ്ഞു
പതിയിരുന്നാക്രമിക്കുന്നവര്‍ക്ക്
പാത താണ്ടും കുഴികളാല്‍ ഒരുക്കുന്നു

ഓണമാണ് ഓണമാണെന്നും
ഓണമാണ് ഓണമാണെന്നും 

Saturday, August 3, 2013

തനിച്ചാക്കിയതെന്തേ

തനിച്ചാക്കിയതെന്തേ 

മരണമണിയുടെ നാക്കില്‍ 
നനവാര്‍ന്നൊരു സ്വനം 
വിസ്മൃതിയിലാർന്ന
മൌനമോ മരണം 
അന്ത്യ കൂദാശയും രാമനാമവും 
ഷഹാദത്ത് കലിമ ചൊല്ലിയിട്ടും ഒന്ന് 
പറയാതെ നീ അവനെ മാത്രമെന്തേ 
കൂടെ കൂട്ടിയിട്ട് എന്നെ 
തനിച്ചാക്കിയിട്ടു നീ 
എങ്ങോ പോയി മറഞ്ഞു

Thursday, August 1, 2013

ദിശ തേടും ഓര്‍മ്മകള്‍

ദിശ തേടും ഓര്‍മ്മകള്‍


ഇഴയുന്ന മനസ്സു മഞ്ഞളാടിയ
കളങ്ങളിൽ പിടി തരാതെ
സർപ്പ പാട്ടിൻ മുഴക്കങ്ങളിൽ
പാതാള ലോകത്തിൻ
പദ സ്വനങ്ങൾ
വൈതരണി പുഴ
നീന്തി കടക്കുമ്പോൾ
ഫണമുയർത്തി മാറടുവാന്‍
സൂര്യ പടം റൌക്ക ലക്ഷമിട്ടു
കടക്കണ്ണിലെ അന്ഗ്നിയാല്‍
ആര്‍ത്തി പുണ്ട രൂപങ്ങള്‍ക്ക്‌
ഉണര്‍വേകുന്ന പുള്ളവ വീണയും
കുടത്തിന്‍ മൂളലുകളും
കുത്തിയോടുന്ന കത്തി മുനയിലെ
അടക്കയും  പൂക്കിലകളും
ഉറഞ്ഞു തുള്ളുമ്പോള്‍ കരിമഷി പടര്‍ന്ന
നിലവിളക്കിന്‍ കൂമ്പുകള്‍ ഓര്‍മ്മകളെ
ഒരു ദിശയിലേക്കു കൊണ്ടു പോയികൊണ്ടിരിക്കുന്നു