ധർമ്മരത്നം മണ്ഡോദരി

ധർമ്മരത്നം മണ്ഡോദരി

ലങ്കാപുരിതൻ മധ്യേ ശോഭിച്ചിടുന്നൊരു,
മഹതിയാം മണ്ഡോദരി തൻ കഥ ചൊല്ലാം!
മയന്റെ പുത്രിയായി, മായാവിലസിതയായ്,
ധർമ്മപരിപാലനതൻ പ്രകാശമായി.

രാവണന്റെ പത്നിയായ്, രാജപത്നിയായ്,
സകലാഭരണഭൂഷിതയായ് വാഴുമ്പോഴും,
അകതാരിൽ നീതിതൻ സ്വരമുണർത്തി അവൾ,
അധർമ്മപഥം തന്നിലെ ചൂടറിഞ്ഞു.

വാല്മീകിതൻ കാവ്യത്തിൽ തിളങ്ങും പ്രഭയായ്,
ദേവിമാഹാത്മ്യത്തിൽ വാഴ്ത്തും ഗുണമായി,
പുരാണങ്ങൾ പാടും പതിവ്രതാ രത്നമായ്,
സീതാദേവിതൻ ദുഃഖത്തിൽ തുണയായി.

ദുരന്തച്ഛായയാൽ മൂടിയോരീ സഭ,
അറിയാതെ പോയോരു സത്യലോകം;
അഭയമരുളുക ഭൂപതി, സകല സമ്മതി,
അഹങ്കാരമിതാ എരിയുമഗ്നിപോൽ.

തൻ പ്രാണനാഥന്റെ ചാരത്തിരുന്നവൾ,
അനുഭവകഥ തൻ നൊമ്പരങ്ങൾ ഓതിയോൾ;
മരണഭയം പോലുമറിഞ്ഞില്ലതാനും,
ധർമ്മമേ, നീ മാത്രമാണെൻ തുണ.

കദനഭാരമാൽ നീറിടുന്നുൾത്തളം,
വിധിയുടെ ലീലകൾ കണ്ടുനിന്നവൾ;
അന്ത്യയാത്രയിൽ പോലും കണ്ണീർ പൊഴിച്ചു,
ലങ്കതൻ മഹതിയാം മഹിളാരത്നം!

ജി. ആർ. കവിയൂർ
03-07-2026
(തിരുവല്ല, കവിയൂർ)