മേഘങ്ങളുടെ ആന (ഐരാവതം)

മേഘങ്ങളുടെ ആന (ഐരാവതം)

നീലവാനത്തിൻ നീലിമയുള്ളിൽ

വെൺമേഘക്കൂട്ടങ്ങൾ മേയുന്ന നേരം,

ഇന്ദ്രന്റെ ദിവ്യഗജം ഐരാവതം

വാനവീഥിയിൽ മന്ദം വരുന്നു.

വെൺമേഘപ്പൂക്കൾ ചേർത്തൊരു ദേഹം,

വെൺനിലാവിൻ തിളക്കമണിഞ്ഞൊരു രൂപം,

അഭ്രമാതംഗമായ് ആകാശവഴിയിൽ

മന്ദമന്ദമായി നീങ്ങുന്നു മേഘം.

വെള്ളിത്തുമ്പിക്കൈ നീട്ടിയുയർത്തി

കുളിർമഴമുത്തുകൾ കോരിച്ചൊരിയാൻ,

ഭൂമിതൻ ദാഹമകറ്റുവാനായി

ആനന്ദവർഷമായ് പെയ്തിറങ്ങുന്നു.

അഞ്ചു ശിരസ്സുകൾ ദിക്കുകൾ കാത്ത്,

ദിവ്യശക്തിയാൽ ലോകം നിറച്ച്,

പാലാഴിത്തിരകളിൽ പിറന്ന നാൾമുതൽ

സ്വർഗ്ഗപ്രതാപമായ് വാഴുന്നു നിത്യം.

കാർമേഘക്കൂട്ടങ്ങൾ തേരിലേറി

ആകാശവീഥിയിൽ യാത്ര പോകുമ്പോൾ,

ഐരാവതത്തിൻ പദനാദമെന്നോണം

ഇടിമുഴക്കങ്ങൾ മുഴങ്ങുന്നു ദൂരെ!

മേഘത്തിൻ മാറിലെ വെൺമയിലായി,

മഴത്തുള്ളിപ്പാട്ടിൻ താളമായ് നീ,

ദേവേന്ദ്രവാഹന ദിവ്യഗജമേ,

വാനത്തിൻ വിസ്മയമല്ലോ ഐരാവതമേ!

രചന: ജീ ആർ കവിയൂർ

27-09-2026

(തിരുവല്ല, കവിയൂർ)