നവനീത ചോരൻ

നവനീത ചോരൻ

പല്ലവി

വെണ്ണയുണ്ണുവാൻ ഉണ്ണിക്കണ്ണൻ വരുമല്ലോ,

വെണ്ണയുണ്ണുവാൻ ഉണ്ണിക്കണ്ണൻ വരുമല്ലോ;

കണ്ണന്റെ കള്ളച്ചിരി കാണുവാനായ്,

കണ്ണായിരം പൂത്തു നിൽക്കുമല്ലോ...

അനുപല്ലവി

പൂർണ്ണചന്ദ്രനും കാർമേഘത്തിൽ മറയുന്നു,

പൂമേഘമാകെ മൗനമായ് നിൽക്കുന്നു;

കണ്ണന്റെ കുസൃതിക്ക് തടസ്സമാകാതായ്,

മാനത്തമ്മാമനും കാത്തുനിൽക്കുന്നു...

ചരണം 1

അരയിലെ കിങ്ങിണി മിണ്ടാതെയാകുന്നു,

അരികിലെ പൂച്ചയും കണ്ണടച്ചിരിക്കുന്നു;

കണ്ണന്റെ കളവിന് കൂട്ടായി നിൽക്കുവാൻ,

കണ്ണൊരു പാതി തുറന്നങ്ങു നിൽക്കുന്നു.

ചരണം 2

മേലേ തൂങ്ങിയൊരു ദീപത്തിൻ നാളം,

താഴേക്കു നോക്കി വഴികാട്ടിടുന്നു;

വെണ്ണക്കുടം തേടിയ കണ്ണന്റെ കൈകളിൽ,

വെളിച്ചം വിതറി വണങ്ങിനിൽക്കുന്നു.

ചരണം 3

മന്ദമാരുതൻ പതുക്കെ മൊഴിയുന്നുവോ,

"ആരുമിങ്ങോട്ടിനി വരരുതേ..."

വെണ്ണക്കണ്ണന്റെ മധുരക്കവർച്ച കാണുവാൻ,

വൃന്ദാവനം മുഴുവൻ സാക്ഷിയായ് നിൽക്കുന്നു.

ചരണം 4

ജന്മജന്മാന്തര പാപങ്ങൾ മുഴുവൻ,

വെണ്ണപോലുരുക്കി നീയെടുക്കേണമേ;

ഭക്തതൻ ചിത്തത്തിലെ മായാവികാരങ്ങൾ,

തിരുമുമ്പിലർപ്പിച്ചു ശുദ്ധമാക്കേണമേ.

ചരണം 5

അടിയന്റെ സകല അപരാധങ്ങളും നീ,

വെണ്ണപോൽ കട്ടുതിന്നേണമേ കൃഷ്ണാ;

ഗുരുവായൂരപ്പാ, നിൻ പാദാരവിന്ദത്തിൽ,

സാഷ്ടാംഗം വീണിതാ ശരണം പ്രാപിക്കുന്നു.

പല്ലവി — ആവർത്തനം

വെണ്ണയുണ്ണുവാൻ ഉണ്ണിക്കണ്ണൻ വരുമല്ലോ,

വെണ്ണയുണ്ണുവാൻ ഉണ്ണിക്കണ്ണൻ വരുമല്ലോ;

കണ്ണന്റെ കള്ളച്ചിരി കാണുവാനായ്,

കണ്ണായിരം പൂത്തു നിൽക്കുമല്ലോ...

ജീ ആർ കവിയൂർ  

17 09 2026  

(തിരുവല്ല, കവിയൂർ)