പ്രതീക്ഷയുടെ തിരിനാളം

പ്രതീക്ഷയുടെ തിരിനാളം

ഇരുളിൻ വഴിയിൽ തിരിനാളം തെളിച്ചു, പ്രതീക്ഷതൻ ദീപം നെഞ്ചിൽ കൊളുത്തി, മടങ്ങിവരില്ലെന്നറിഞ്ഞിട്ടു പോലും, മനസ്സിൻ വാതിൽ തുറന്നുവെച്ചു.

വരവിനായ് കാത്തൊരു സന്ധ്യകൾ മാഞ്ഞു, വഴിയോര പൂക്കളും വാടിക്കൊഴിഞ്ഞു, മറക്കുവാൻ നോക്കിയ ഓർമ്മകൾ വീണ്ടും, മൗനമായ് വന്നു മനസ്സിൽ നിറഞ്ഞു.

കാലത്തിൻ കൈകൾ മുറിവുകൾ മായ്ക്കും, കണ്ണീരിൻ നീരും പുഞ്ചിരിയായ് മാറും, തകർന്ന സ്വപ്നങ്ങൾ ചിറകുകൾ നേടി, പുതിയൊരു പുലരി ജീവിതം തീർക്കും.

വരാതിരുന്നാലും വസന്തം വഴിയിൽ, വാടാത്ത മോഹങ്ങൾ പൂക്കും ഹൃദയത്തിൽ, വിധിയുടെ മുന്നിൽ തലകുനിയാതെ, വിശ്വാസദീപം അണയാതെ നിൽക്കും.

ജീ ആർ കവിയൂർ 

20 10 2026

( തിരുവല്ല, കവിയൂർ)