തലമുറകളുടെ തീരങ്ങളിൽ നിന്ന്

അനന്തമാം കാലപ്രവാഹത്തിൻ തീരത്ത്

അറിവിൻ വലയെറിഞ്ഞു നിൽപ്പു മർത്യർ;

മുന്നിൽ പരന്നുകിടക്കും സാഗരത്തിൽനിന്ന്

തലമുറകൾ നാളെയുടെ വെളിച്ചം തേടുന്നു.

പച്ചപ്പുതച്ച മലനിരതൻ സാന്നിധ്യത്തിൽ

പ്രകൃതിതൻ ചൈതന്യം നെഞ്ചിലേറ്റുന്നു;

കൺമുന്നിൽ കാണുന്നീ വിസ്മയക്കാഴ്ചകൾ

പുതിയൊരു പ്രത്യാശതൻ ചിറകുകൾ നൽകുന്നു.

ഒരു കൈയിൽ അനുഭവത്തിൻ കരുത്തുമായി

മറുകൈയിൽ സ്വപ്നത്തിൻ നൂലുകൾ കോർത്തു;

തലമുറകൾ കൈമാറും ജ്ഞാനത്തിൻ വിത്തുകൾ

ഈ മണ്ണിൽ വീണ്ടും മുളച്ചുയരുന്നു.

കാഴ്ചകൾക്കപ്പുറമുള്ളൊരു സത്യം തേടി

ഈ യാത്ര തുടരുന്നു നിശ്ശബ്ദമായി;

പ്രകൃതിയോടിണങ്ങിയീ ജീവിതയാത്രയിൽ

മാനവർ പ്രപഞ്ചത്തിൻ സ്പന്ദനം തൊട്ടറിഞ്ഞുവെങ്കിൽ ?!!

വസുധൈവ കുടുംബകമെന്ന ചിന്തയാൽ

ലോകസമസ്താ സുഖിനോ ഭവന്തുവെന്ന

പ്രാർത്ഥനയോടെ സമർപ്പിക്കുന്നു...

(ഇത് എഴുതാൻ ഉള്ള സാഹചര്യം ഒരു ചിത്രമാണ്)

ജി ആർ കവിയൂർ

24/05/2026

(കവിയൂർ, തിരുവല്ല)

ആത്മാവിഷ്കാരങ്ങള്‍