മതം മദമാകരുത്(തത്ത്വചിന്താപരമായ സന്ദേശ കവിത)

മതം മദമാകരുത്

(തത്ത്വചിന്താപരമായ സന്ദേശ കവിത)

മതം മദമാകരുതേ മനുഷ്യാ,

മനസ്സിൽ വിദ്വേഷം നിറയരുതേ,

ഈശ്വരസാക്ഷാത്കാരമല്ലോ

ആത്മാവിൻ വെളിച്ചമായ് തെളിയേണ്ടത്.

മതിലുകൾ തീർക്കാനല്ല മതം,

മനസ്സുകൾ ചേർക്കാനല്ലോ മതം,

അന്യൻ്റെ കണ്ണീരൊപ്പുന്ന നേരം

അവിടെയല്ലോ ദൈവദർശനം.

മതം പലതരം വഴികൾ കാട്ടും,

മനനം സത്യത്തിലേക്കു നയിക്കും,

അഹന്തയാകുന്ന അന്ധത നീക്കി

അറിവിൻ ദീപം തെളിയിക്കണം.

മത്തഗജത്തെപ്പോൽ മദമിളകി

മനുഷ്യൻ മനുഷ്യനെ ചവിട്ടരുതേ,

വിശ്വാസമെന്നത് വിനയമാകണം,

വിദ്വേഷമെന്നത് വളരരുതേ.

മതം മദമാകരുതേ മനുഷ്യാ,

മനസ്സിൽ വിദ്വേഷം നിറയരുതേ,

ഈശ്വരസാക്ഷാത്കാരമല്ലോ

ആത്മാവിൻ വെളിച്ചമായ് തെളിയേണ്ടത്.

പേരുകൾ പലതും പൂജകൾ പലതും,

പ്രാർത്ഥനകൾ പലതുണ്ടീ ഭൂവിൽ,

സ്നേഹമില്ലാത്ത ആരാധനകൾ

സാരമില്ലാത്ത ശബ്ദങ്ങളല്ലോ.

വിശക്കുന്നവന് അന്നം നൽകുക,

വിഷമിക്കുന്നവന് തുണയായ് നിൽക്കുക,

വീഴുന്നവനെ കൈപിടിച്ചുയർത്തുക,

വിശുദ്ധിയതിലല്ലോ ജീവിതത്തിൽ.

ഈശ്വരനെന്നൊരു സത്യത്തെ തേടി

എത്രയോ വഴികളിലൂടെ നടന്നു,

സ്വന്തം ഹൃദയത്തിൻ നന്മയിലേക്കു

തിരിഞ്ഞുനോക്കാൻ മറന്നുപോയി.

അന്യനിൽ ദൈവത്തെ കാണുന്ന കണ്ണും,

അനുകമ്പയുള്ളൊരു ഹൃദയവുമെങ്കിൽ,

ആത്മസാക്ഷാത്കാരത്തിൻ പാതയിൽ

ആദ്യചുവടായി മാറിയിടും.

മതം മനുഷ്യനെ നന്മ പഠിപ്പിക്കട്ടെ,

മനസ്സിൽ കരുണ നിറച്ചിടട്ടെ,

ജാതിയും മതവും വേലികളാകാതെ

സ്നേഹത്തിൻ പൂന്തോട്ടമാകട്ടെ.

ഭൂമിയൊരൊറ്റ കുടുംബമെന്നുള്ള

ബോധം ഹൃദയങ്ങളിൽ വിരിയട്ടെ,

ഈശ്വരനാമത്തിൽ കൈകൾ ചേരുമ്പോൾ

ഇനിയീ ലോകം സ്വർഗമാകട്ടെ.

മതം മദമാകരുതേ മനുഷ്യാ,

മനസ്സിൽ വിദ്വേഷം നിറയരുതേ,

ഈശ്വരസാക്ഷാത്കാരമല്ലോ

ആത്മാവിൻ വെളിച്ചമായ് തെളിയേണ്ടത്.

മതിലുകൾ തീർക്കാനല്ല മതം,

മനസ്സുകൾ ചേർക്കാനല്ലോ മതം,

സ്നേഹമാകട്ടെ നമ്മുടെ ധർമം,

മാനവസേവയാകട്ടെ കർമം.

മനം മയക്കുന്ന ലഹരിയായി

വെറുപ്പും വിദ്വേഷവും പടർത്തരുതേ,

മാനവസ്നേഹത്തിൻ സന്ദേശമായി

മാറട്ടെ ഇന്നിൻ മതമെന്ന മന്ത്രം.

രചന: ജീ ആർ കവിയൂർ

തീയതി: 11-10-2026

(തിരുവല്ല, കവിയൂർ)