അപരിചിതരായവർ

അപരിചിതരായവർ

ഹൃദയംകൊണ്ടു ചേർത്ത ബന്ധങ്ങൾ,

കാലം കടന്നപ്പോൾ കാറ്റിലലിഞ്ഞു;

ആവശ്യമുള്ളിടത്തോളം മാത്രം

ചിലർ കൂടെയുണ്ടായിരുന്നു.

സ്നേഹത്തിന്റെ ചൂടേകിയ കൈകൾ

സ്വാർത്ഥതയുടെ നിഴലിൽ തണുത്തു;

കൂടെ നടന്ന വഴികൾക്കൊക്കെയും

ഒടുവിൽ അന്യവഴികളായി.

നൽകിയ നന്മകൾ ഓർമ്മയാകാതെ,

നേടിയ നേട്ടങ്ങൾ മാത്രം ശേഷിച്ചു;

ബന്ധമെന്ന പേരിൽ ചേർന്നവർ

ബന്ധനമഴിഞ്ഞപ്പോൾ അകന്നുപോയി.

മിഴിനനവിന് സാക്ഷിയാകാതെ

മൗനം മാത്രം കൂട്ടായി നിന്നു;

മനസ്സറിഞ്ഞു ചേർത്തുവച്ചവർ

മനസ്സറിയാതെ മറന്നുപോയി.

എങ്കിലും പിണക്കമില്ല,

പരാതിയുമില്ല, പരിഭവവുമില്ല;

അകന്നുപോയ ഓരോരുത്തരും

ഒരു പാഠം സമ്മാനിച്ചുപോയി—

ബന്ധങ്ങൾ ഹൃദയത്തിൽ സൂക്ഷിക്കാം,

പക്ഷേ പ്രതീക്ഷകൾ കുറച്ചുവെക്കാം;

സ്നേഹം പകരാൻ മടിക്കേണ്ട,

തിരിച്ചുകിട്ടുമെന്നു മാത്രം

മനസ്സിൽ കാത്തിരിക്കരുത്.

ജീ ആർ കവിയൂർ

04-10-2026

(തിരുവല്ല, കവിയൂർ)