മൗനത്തിന്റെ ഭാഷ

മൗനത്തിന്റെ ഭാഷ

വാക്കുകളേറെ വിതുമ്പുമ്പോഴും

വാതിലടയ്ക്കാറുണ്ടൊരു മൗനം;

എല്ലാം പകരുക സാധ്യമല്ലാ—

തുള്ളിയൊതുക്കും നോവുകൾ പോലെ.

തെറ്റിദ്ധാരണ പൂണ്ടൊരു മിഴിയിൽ

സത്യമെഴുതാൻ തുനിയരുതാരും;

കേൾക്കാൻ മടിയുള്ളോർ തൻ മുന്നിൽ

വ്യർത്ഥമതല്ലോ നീതിവിചാരം.

വാദങ്ങൾക്കൊടുവിൽ പതിയെയടങ്ങി

വേർപെടുകയാണോരോ നിനവും;

ശേഷിപ്പായ് മനമുരുകിയൊടുവിൽ

പൂക്കുവതൊരു ശാന്തത മാത്രം.

തോൽവിയതല്ലീ ശാന്തനിശ്ശബ്ദത,

കാലം തീർത്തൊരു പക്വതയത്രേ;

സ്വയമറിയുന്നൊരു സത്യത്തിന്നായ്

വാക്കുകൾ കൊണ്ടൊരു വാദമതെന്തിന്!

ജീ ആർ കവിയൂർ 

04 10 2026

( തിരുവല്ല, കവിയൂർ)