ആവശ്യമുള്ള നേരത്ത്

ആവശ്യമുള്ള നേരത്ത്

മഴപോലെ ചില സൗഹൃദങ്ങൾ വന്നെത്തും,

മാനം തെളിഞ്ഞാൽ മേഘംപോലെ മാഞ്ഞുപോകും;

ആവശ്യമുള്ള നേരം ചേർന്നുനിൽക്കും,

ആവശ്യം തീർന്നാൽ വഴിമാറിപ്പോകും.

ആൾക്കൂട്ടത്തിൽ ആയിരം സ്വന്തങ്ങൾ കാണും,

ആപത്തിൽ വിളിച്ചാൽ നിശ്ശബ്ദത മാത്രം കേൾക്കും;

ചിരിയിൽ പങ്കുചേരാൻ പലരും വരും,

ചിന്തയിൽ കൂടെയിരിക്കാൻ വിരളം പേരും.

വിജയവേളയിൽ കൈകൾ നിറയും,

വീഴ്ചയുടെ നാളിൽ വിരലുകൾ ചുരുങ്ങും;

കണ്ണീരിൻ ചൂടറിയുന്ന ഹൃദയങ്ങൾ കുറയും,

കാണാത്ത വേദനകൾ ഉള്ളിൽ വളരും.

കാലം നൽകുന്ന പാഠം മറക്കരുത്,

കൂടെ നിൽക്കുന്നവരെ ഒരിക്കലും നഷ്ടപ്പെടുത്തരുത്;

ആവശ്യമുള്ള നേരത്ത് കൈപിടിക്കുന്നവനാണ്,

ആൾക്കൂട്ടത്തിനിടയിലും യഥാർത്ഥ സ്വന്തമാകുന്നത്.

രചന: ജീ ആർ കവിയൂർ

06-10-2026

തിരുവല്ല, കവിയൂർ