കണ്ടറിഞ്ഞ ജീവിതം

കണ്ടറിഞ്ഞ ജീവിതം

ഈ ലോകം ഏറെ ദൂരം നടന്നറിഞ്ഞു,

വേദന മുതൽ ആനന്ദം വരെ തൊട്ടറിഞ്ഞു;

ആത്മാർത്ഥത തേടി വഴികളേറെ പിന്നിട്ടിട്ടും,

സ്നേഹത്തിൻ വിശുദ്ധി വിരളമെന്നറിഞ്ഞു.

വിനയത്തിൻ മാധുര്യം ഹൃദയത്തിൽ നിറഞ്ഞു,

അഹങ്കാരത്തിൻ തീ പലരിലും പടർന്നു;

പുഞ്ചിരിക്ക് പിന്നിലെ കണ്ണുനീർ വായിച്ചു,

മൗനത്തിനുള്ളിലെ നിലവിളിയും കേട്ടു.

ബന്ധങ്ങൾ വന്നു, ചിലതൊക്കെ അകന്നു,

സ്വാർത്ഥതയെത്തുമ്പോൾ സ്നേഹവും മാഞ്ഞു;

വിശ്വാസം നൽകി വാതിൽ തുറന്നിടുമ്പോൾ,

പിറകിൽനിന്നെത്തിയ കുത്തുകളും ഏറ്റു.

മുഖങ്ങൾ മാറിയാലും കാലം സാക്ഷിയായി,

വാക്കുകൾ മാഞ്ഞാലും പ്രവൃത്തികൾ ശേഷിച്ചു;

സത്യത്തിന്റെ പാതയിൽ ഏകാന്തത വന്നാലും,

നേരിന്റെ ദീപം ഉള്ളിൽ കെടാതെ നിന്നു.

ജീവിതം നൽകിയ ഓരോ മുറിവിനും,

കാലം പതിയെ അർത്ഥം പകർന്നു;

നഷ്ടങ്ങളൊക്കെയും പാഠങ്ങളായപ്പോൾ,

സ്വയം തിരിച്ചറിയൽ വലിയ നേട്ടമായി.

ഇനിയൊരു മുഖത്തെ വിലയിരുത്തുമ്പോൾ,

പുറമല്ല, ഉള്ളമാണ് അളവുകോലാകുക;

വാക്കുകളേക്കാൾ പ്രവൃത്തിക്ക് വില നൽകും,

നന്മയുള്ള ഹൃദയത്തെ ചേർത്തുപിടിക്കും.

ലോകം മുഴുവൻ ചുറ്റിയെത്തിയാലും,

മനുഷ്യഹൃദയത്തിൻ ആഴം തീരുകയില്ല;

അവസാന ശ്വാസത്തിലും സത്യം കാത്തുസൂക്ഷിച്ചാൽ,

ജീവിതയാത്രയ്ക്ക് അതിലും വലിയ വിജയമില്ല.

ജീ ആർ കവിയൂർ

05-10-2026

(തിരുവല്ല, കവിയൂർ)