രാമായണത്തിലെ ചൊല്ലുകൾ

രാമായണത്തിലെ ചൊല്ലുകൾ

നാടൻ വഴികളിൽ ശോഭിച്ചുനിൽപ്പൂയീ

ചൊല്ലുകൾ രാമായണ സാരങ്ങൾ;

മനസ്സിൽ പതിഞ്ഞീടും മനോഹരഗാഥാ-

സ്മരണകൾ നൽകുമീ വരികളിൽ.

നൽകിയ വാക്കിനെ കാത്തുസൂക്ഷിക്കുവാൻ

ദശരഥൻ ജീവൻപോലും നൽകിയില്ലേ;

“ദശരഥന്റെ വാക്ക്” പോലെ വാക്കിനായ്

ജീവിതം പോലും സമർപ്പിക്കണമെന്നു.

കൈകേയി ചോദിച്ച രണ്ടു വരങ്ങൾ

അയോധ്യയുടെ വിധി മാറ്റിമറിച്ചില്ലേ;

“കൈകേയിയുടെ വരം” എന്നൊരു ചൊല്ലിൽ

ചെറുകാര്യത്തിൻ വലിയ ഫലം കാണാം.

വനവാസമെന്നാൽ സുഖം വെടിഞ്ഞൊരു

കഷ്ടപ്പാടിന്റെ ജീവിതമെന്നല്ലോ;

രാമന്റെ പതിനാലു വർഷം പോലെ

കാത്തിരിപ്പിന്റെ കാലമെന്നാകുന്നു.

അതിരുവരമ്പുകൾ കാത്തിടാനായ്

“ലക്ഷ്മണരേഖ” തീർത്തുവച്ചില്ലേ;

കടന്നുപോകാൻ പാടില്ലെന്നുള്ള

കൽപ്പനയാണിന്നും ചൊല്ലായ് മാറിയത്.

കാത്തിരുന്ന ഭക്തിയിലൊരുനാൾ

രാമനെ കണ്ടു ധന്യയായ് ശബരി;

“ശബരിയുടെ ഭക്തി” പോലെ നിർമ്മല

സ്നേഹത്തിനിന്നും മാതൃകയാകുന്നു.

സ്വർണ്ണമാൻ തീർത്ത മായാവലയിൽ

സത്യത്തെ മറച്ചൊരു മാരീചനല്ലോ;

“മാരീചന്റെ മായ” പോലെ ഇന്നും

വഞ്ചനയുടെ വലയത്തെ വിളിക്കുന്നു നമ്മൾ.

സീതയെ കവർന്ന രാവണന്റെ പ്രവൃത്തി

ധർമ്മവഴിയിൽ തീർത്തൊരു കറയല്ലോ;

“സീതാപഹരണം” പോലെ ഇന്നും

നഷ്ടത്തിന്റെ വേദനയെ വിളിക്കുന്നു നമ്മൾ.

ധർമ്മത്തിനായ് ജീവൻ സമർപ്പിച്ച

ജടായുവിൻ ത്യാഗം മറക്കുമോ നമ്മൾ;

“ജടായുവിൻ ത്യാഗം” പോലെ മഹത്തായ

സേവനമെന്നെന്നും സ്മരിക്കപ്പെടും.

ആകാശമളക്കും വേഗതയോടെ

സാഗരം താണ്ടിയ വീരൻ ഹനുമാൻ;

“ഹനുമാൻചാട്ടം” പോലെ വമ്പിച്ചൊരു

ചാട്ടമെന്നാകുന്നു നാട്ടുചൊല്ലായ്.

മറന്നുപോയൊരു ശക്തിയുമായ്

മനസ്സിലുറങ്ങുന്ന കഴിവുണർത്താൻ;

“ഹനുമാന്റെ ശക്തി” ഓർമ്മിപ്പിച്ചെന്നപോൽ

സ്വന്തം കഴിവിനെ തിരിച്ചറിയാം.

പണിയെടുക്കും ചെറുകൈകൾ പോലും

സേതുനിർമ്മാണത്തിൽ പങ്കുചേർന്നപോൽ;

“അണ്ണാറക്കണ്ണനും തന്നാലായത്” എന്ന

ചൊല്ലിനുള്ളിലുണ്ടാ സേവനമഹിമ.

ചൂർന്ന കോപത്താൽ സർവ്വവും തീർത്തൊരു

കൂറ്റൻ പരാക്രമം കാട്ടിയ നാളുകൾ;

“ലങ്കാദഹനം” പോലെ കത്തിയെരിയുന്ന

ക്രോധത്തെ ഓർമ്മിപ്പൂ വരികളിന്നും.

അഹങ്കാരത്തിൽ അന്ധനായ രാവണൻ

ലങ്കയുടെ ശക്തിയിലഭിമാനിച്ചപ്പോൾ;

“രാവണന്റെ അഹങ്കാരം” എന്നൊരു

ചൊല്ലിൽ പതിയുന്നു നാശത്തിന്റെ പാഠം.

സ്വന്തം ബലത്തിൽ മദിച്ചുനിന്നൊരു

വാലിയുടെ വീര്യം ഓർമ്മ വരുമ്പോൾ;

“വാലിയുടെ ബലം” എന്നു പറഞ്ഞുപോരും

അളവറ്റ ശക്തിയെ വാഴ്ത്തിടുവാൻ.

ധർമ്മവഴിയിൽ ഉറച്ചുനിന്നൊരു

വിഭീഷണന്റെ വാക്കുകൾ ഓർത്തിടുമ്പോൾ;

“വിഭീഷണന്റെ ഉപദേശം” പോലെ

നന്മയുടെ വാക്കുകൾ വിലമതിക്കുന്നു.

ലക്ഷ്യം പിഴയ്ക്കാത്ത ശക്തിയുമായ്

തീർക്കുവാൻ പോന്നൊരു ദിവ്യായുധം;

“രാമബാണം” പോലെ കൃത്യമായൊന്നാൽ

കാര്യങ്ങൾ തീരും എന്നുറപ്പു പറയാം.

മടങ്ങിവരുവാൻ പ്രയാസമുള്ളൊരു

ദുർഘടപാതയിൽ ചെന്നെത്തും കാര്യങ്ങൾ;

“ബലികേറാമല” പോലെ ദുർഗ്ഗമമായ

കാര്യങ്ങളെയോർത്ത് ചൊല്ലുന്നു നമ്മൾ.

നാടൊട്ടുമേ നീതി പവിത്രമായ് വാഴുന്ന

ശാന്തിയും സമാധാനവും നിറഞ്ഞ ഭൂമി;

“രാമരാജ്യം” പോലെ സൽഭരണത്തെ

വാഴ്ത്തിടാൻ നാവിൽ മുഴങ്ങുമീ നാമം.

സത്യം തെളിയിക്കാൻ അഗ്നിയിൽ ചാടിയ

ശുദ്ധിയാം സീതയുടെ നിർമ്മല സത്യം;

“അഗ്നിപരീക്ഷ” പോലെ ജീവിതത്തിലും

വന്നുചേരും പല പരീക്ഷണങ്ങൾ.

രാമായണഗാഥകൾ കാലം കഴിഞ്ഞും

നാടിന്റെ നാവിൽ നിലനിൽക്കുന്നു;

ജീവിതവഴികളിൽ വെളിച്ചം പകരുന്ന

വാക്കുകളായവ നമ്മിൽ നിറയുന്നു.

ചൊല്ലുകളിൽ രാമനും സീതയും

ഹനുമാനും ധർമ്മവും ജീവിക്കുന്നു;

തലമുറതോറും പകർന്നുനൽകുന്ന

രാമായണസ്മൃതികൾ മായുന്നില്ല.

നാടൻ വഴികളിൽ ശോഭിച്ചുനിൽപ്പൂയീ

ചൊല്ലുകൾ രാമായണ സാരങ്ങൾ;

മനസ്സിൽ പതിഞ്ഞീടും മനോഹരഗാഥാ-

സ്മരണകളായ് എന്നും നിലനിൽക്കും.

ജീ ആർ കവിയൂർ

10 -08-2026

(തിരുവല്ല, കവിയൂർ)