കണ്ണനർപ്പിക്കാം

കണ്ണനർപ്പിക്കാം

എന്തു ചെയ്താലും കണ്ണനെ സ്മരിക്കാം,

എൻ കർമ്മമെല്ലാം കണ്ണനർപ്പിക്കാം;

കണ്ണന്റെ കൃപയിൽ കൈകോർത്തു നീങ്ങാം,

കണ്ണാ, നിൻ പാദം ശരണം പ്രാപിക്കാം.

ധർമ്മപുത്രനും ചൂതിലകപ്പെട്ടപ്പോൾ,

ധർമ്മവഴിയിൽ നിന്നകന്നുപോയപ്പോൾ,

കണ്ണനെ മറന്നൊരു നിമിഷമതുമൂലം

കാണാത്ത ദുഃഖത്തിൻ പാതയിൽ വീണു.

കണ്ണനെ സ്മരിച്ചാൽ വഴിതെറ്റില്ലല്ലോ,

കണ്ണന്റെ കൃപയിൽ ഭയമില്ലല്ലോ;

ചെയ്യുന്ന കർമ്മങ്ങൾ കണ്ണനർപ്പിച്ചാൽ,

ചെല്ലുന്ന വഴികളിൽ നന്മയേ വരൂ.

ജയവും പരാജയവും കണ്ണനേൽപ്പിക്കാം,

സുഖവും ദുഃഖവും കണ്ണനേൽപ്പിക്കാം;

നമ്മുടേതെന്നുള്ള മമതയൊഴിഞ്ഞാൽ,

നാരായണൻ മാത്രം തുണയായ് മതി.

അവനല്ലാതാരുണ്ട് ആശ്രയമായ്?

അവനല്ലാതാരുണ്ട് തുണയായ്?

അവന്റെ തിരുനാമം ഹൃദയത്തിൽ ചേർത്ത്,

അവന്റെ പാദത്തിൽ എല്ലാം സമർപ്പിക്കാം.

ലോകമൊന്നാകെ എതിരായ് നിന്നാലും,

ലോകനാഥൻ കൂടെയുണ്ടെങ്കിൽ ഭയമേത്?

സിംഹത്തിൻ പുറത്തിരിക്കുന്നവനെന്നും

സിംഹത്തെ കണ്ടാൽ ഭയപ്പെടുമോ?

ഹരിയെ നോക്കി നാം മുന്നേറിടാം,

ഹരിനാമം ചൊല്ലി വഴിയേറിടാം;

കണ്ണൻ കൂടെയുണ്ടെന്ന വിശ്വാസമൊന്നാൽ,

കൃഷ്ണാ, നിൻ പാദം തേടി നടന്നിടാം.

കണ്ണാ... കണ്ണാ... കൃഷ്ണാ...

എൻ കർമ്മമെല്ലാം നിനക്കർപ്പിക്കാം,

എൻ ജീവിതമെല്ലാം നിനക്കർപ്പിക്കാം;

നീയേ ശരണം... നീയേ ശരണം...

ഗോവിന്ദാ... കൃഷ്ണാ... ഹരേ...

ജീ ആർ കവിയൂർ

10 -08-2026

(തിരുവല്ല, കവിയൂർ)