കൈതപ്പൂവിന്റെ ഗന്ധം

കൈതപ്പൂവിന്റെ ഗന്ധം

കായലോരക്കാറ്റിൽ മെല്ലെ തലോടി,

കൈതപ്പൂവൊന്നു പുഞ്ചിരി തൂകി,

വെള്ളിനിലാവിന്റെ വിരൽത്തുമ്പേറി,

നറുമണം മെല്ലെ പരന്നു ദൂരേ.

പാടവരമ്പിലെ പച്ചപ്പിനുള്ളിൽ,

പാതിവിരിഞ്ഞൊരു സ്വപ്നംപോലെ,

കാറ്റിൽ അലിയും നറുമണം പോലെ,

കായലോരമാകെ നീ പടർന്നു.

ഓർമ്മത്തണലിൽ വന്നണയുമ്പോൾ,

ഓടിയെത്തുന്നു ബാല്യവഴികൾ,

മണ്ണിന്റെ മണം നിറഞ്ഞ മുറ്റത്ത്,

മുത്തശ്ശിക്കഥകൾ ഉണരുന്നു വീണ്ടും.

സന്ധ്യ മയങ്ങും വേളയിലൊക്കെയും,

കൈതപ്പൂവിന്റെ നറുമണം പോലെ,

മനസ്സിൻ കോണിൽ കാത്തുവച്ചൊരു,

മറക്കാനാവാത്ത നാളായ് നീ.

രചന: ജീ ആർ കവിയൂർ

10-09-2026

(തിരുവല്ല, കവിയൂർ)