മായാത്ത അക്ഷരങ്ങൾ

മായാത്ത അക്ഷരങ്ങൾ

തിരികെ കിട്ടുമെന്നാശിച്ചല്ല തന്നത്,

തിരികെ വരുമെന്ന മോഹവുമില്ല;

വെറും കടലാസായ് വലിച്ചുകീറാൻ

എൻ ഹൃദയത്താളായിരുന്നില്ല.

എൻ അക്ഷരക്കൂട്ടുകൾ വാക്കുകളല്ല,

എൻ ഉള്ളിൽ വിരിഞ്ഞ പൂക്കളല്ലോ;

മിഴിനീരിൽ നനഞ്ഞു പിറന്നവ,

മിഴിയടച്ചാലും മായാത്തവയല്ലോ.

മഷിയല്ല, എൻ നിശ്വാസമായിരുന്നു

ഓരോ വരിയിലും പടർന്നതെല്ലാം;

നിനക്കായ് തുറന്ന ഹൃദയത്താളിൽ

നിശ്ശബ്ദമായി കുറിച്ചതായിരുന്നു.

കീറിയ താളിൻ തുണ്ടുകൾക്കുള്ളിൽ

കിതച്ചിരുന്നു എൻ ഹൃദയമിടിപ്പ്;

ചിതറിയ വരികൾ ചേർത്തുനോക്കൂ,

ചിതറാത്തൊരു ലോകം കാണാമവിടെ.

നീ മറന്നാലും മായുകയില്ല,

നീ തള്ളിയാലും തീരുകയില്ല;

എൻ വിരൽത്തുമ്പിൽ പിറന്നതെല്ലാം

കാലം മായ്ക്കാത്ത കുറിമാനമാകും.

രചന: ജീ ആർ കവിയൂർ

09-09-2026

(തിരുവല്ല, കവിയൂർ)