മനുഷ്യനാകാനുള്ള കല

മനുഷ്യനാകാനുള്ള കല

മനുഷ്യനായി പിറന്നതുകൊണ്ടു മാത്രം,

മഹത്ത്വമുണ്ടാകില്ല ജീവിതയാത്രയിൽ,

പരദുഃഖമറിയുന്നൊരു മനസ്സുണ്ടെങ്കിൽ,

പുണ്യമായ് മാറും ഈ ജന്മം ഭൂമിയിൽ.

അധികാരമല്ലൊരു വ്യക്തിത്വമുദ്ര,

അഹങ്കാരമല്ലൊരു വിജയത്തിന്റെ മുദ്ര,

അശരണർക്കേകുന്നൊരു കൈത്താങ്ങിനോളം,

അമൂല്യമായ് മറ്റെന്തുണ്ട് ലോകത്തിൽ.

ക്ഷമയുടെ ഭാഷയിൽ സ്നേഹം വിരിയും,

കരുണയുടെ സ്പർശത്തിൽ മുറിവുണങ്ങും,

പകയുടെ ചിന്തകൾ അകന്നുപോകുമ്പോൾ,

പുതിയൊരു മാനവികത പുലർന്നുയരും.

പങ്കുവെക്കാനൊരു ഹൃദയമുണ്ടാകണം,

പൊറുക്കുവാനൊരു മനസ്സുണ്ടാകണം,

അന്യന്റെ കണ്ണീർ തുടയ്ക്കുന്ന നേരം,

മനുഷ്യനാകുന്ന കല പൂർത്തിയാകുന്നു.

ജീ ആർ കവിയൂർ

14 11 2026

(തിരുവല്ല, കവിയൂർ)