ഓണമാണെന്നും

 ഓണമാണെന്നും

ഓലം കൂട്ടും ഓളം തല്ലുന്നുമെൻ
ഓര്‍മ്മകളെ ഒന്നു ഓമനിക്കാന്‍
ഒരുങ്ങുന്നു മനസ്സിലായങ്ങു
ഒരുമയുടെ പേരുമയാല്‍ ഒത്തുചേരും

തുമ്പിതുള്ളലും തുമ്പപ്പൂ ഒരുക്കലും
തൂശനിലയില്‍ വിളമ്പിയുണ്ടും
തുള്ളി കളിച്ചു ഊയലാടുമാ
തുഷാര ബിന്ദുക്കളുടയും പോലെ

ഓടിയകന്നുവല്ലോ കിനാക്കളെല്ലാം
ഒരായിരമാഘോഷങ്ങളൊത്തു ചേരുമാ
ഓണത്തിന്‍ നിറം പകര്‍ന്നയകന്നാരെന്‍
ഓമല്‍ ബാല്യകൗമാരങ്ങളൊക്കെ

ഇന്നുണ്ടോ അറിവു അന്നിന്‍
ഇഴയടുപ്പിക്കും ഈണം പകരുമാ
ഈരടി പാടുമാ പാട്ടുകളൊക്കെ
ഇല്ല ചതിയുമില്ല പൊളിവചനങ്ങളും

ഒട്ടല്ല കൗതുകമേറുന്നു നാട്ടിലായി
ഓശാന പാടിയും ഒറ്റക്കും പെട്ടക്കും
ഒറ്റുകൊടുക്കുന്നു കര്‍ക്കിടത്തിനൊപ്പം
ഒരല്‍പ്പമില്ല നാണവും മാനവും

പണമാണ് നിണത്തെക്കാള്‍
പെരുത്തതെന്നു പറഞ്ഞു
പതിയിരുന്നാക്രമിക്കുന്നവര്‍ക്ക്
പാത താണ്ടും കുഴികളാല്‍ ഒരുക്കുന്നു

ഓണമാണ് ഓണമാണെന്നും
ഓണമാണ് ഓണമാണെന്നും